Mark 8

Yesus a na tamo 4,000 naŋgi iŋgi anainjrej

1Onaqa bati bei Yesus a wadau sawaq di sonaqa tamo uŋgasari tulaŋ gargekoba naŋgi olo aqa areq di korooqneb. Naŋgi iŋgi saiqoji. Deqa Yesus a na aqa aŋgro naŋgi metnjrnaqa aqa areq bonabqa minjrej, 2“Tamo uŋgasari naŋgi bati qalub e koba na soqneb naŋgi iŋgi saiqoji. Deqa e naŋgi qa are ugeibqo. 3Naŋgi qudei isaq na beb. Deqa e naŋgi mam ti suweinjritqa gamq dia naŋgi mam na lao uge.” 4Degsi minjrnaqa naŋgi na kamba minjeb, “Sawa endi wadau. Deqa iga iŋgi qabe na osimqa tamo uŋgasari gargekoba endego anainjronam kereqas?” 5Onaqa Yesus na minjrej, “Niŋgi bem gembub unu?” Onaqa minjeb, “Bem 7-pela unu.”

6Onaqa Yesus na tamo uŋgasari naŋgi minjrej, “Niŋgi kalil mandamq di awoeleŋoiye.” Degsi minjrnaqa naŋgi kalil mandamq di awoonabqa Yesus na bem 7-pela di osiqa Qotei pailyosiqa bem giŋgeŋyosiqa aqa aŋgro naŋgi enjreqnaqa naŋgi na osi giloqnsibqa tamo uŋgasari naŋgi enjreqnab uyoqneb. 7Qe kiñilala qudei dego soqneb. Deqa Yesus na qe di osiqa Qotei pailyosiqa aqa aŋgro naŋgi minjrej, “Qe endi dego tamo uŋgasari naŋgi anainjriye.” Degsi minjrnaqa naŋgi na qe di osib tamo uŋgasari naŋgi jeisib enjreqnab uyoqneb. 8Uynab kalil menetnjrej. Onaqa iŋgi oto urateleŋeb qaji di Yesus aqa aŋgro naŋgi na koroiyosib gumba kokba 7-pelaq di jignab maqeleŋej. 9Tamo kalil iŋgi uyeb qaji naŋgi sisiyeb 4,000.

Onaqa Yesus a na tamo uŋgasari kalil naŋgi suweinjrnaqa naŋgo qure qureq giloqneb. 10Naŋgi gileqnabqa Yesus na aqa aŋgro naŋgi olo joqsiqa koba na qobuŋ bei gogetosib Dalmanuta sawaq gileb.

Farisi tamo qudei naŋgi Qotei aqa maŋwa bei unqajqa deqa Yesus minjeb

11Onaqa bati bei Farisi qudei naŋgi Yesus aqa areq bosibqa a anjam bei grotimqa qusib a ojqajqa deqa a ombla anjam na qoteb. Osib gisaŋyosib minjeb, “Ni endego Qotei aqa maŋwa bei babtimqa iga unsim dena poigwas, ni Qotei aqa wau ojeqnum.” 12Degsib Yesus minjnabqa a naŋgi qa are tulaŋ gulubeiyonaqa jagwa titsiqa minjrej, “Niŋgi tamo uŋgasari bini bati endeqa unub qaji kiyaqa e Qotei aqa maŋwa bei laŋa babtit niŋgi unqajqa merbeqnub? Niŋgi quiye. E Qotei aqa maŋwa bei niŋgi osorŋgwasai.” 13Yesus a Farisi naŋgi degsi minjrsiqa naŋgi uratnjrsiqa aqa segi aŋgro naŋgi ti olo qobuŋ gogetosibqa ya agu taqal beiq gileb.

Yesus a bem tiyeqnu qaji sum qa yawo anjam marej

14Ariya naŋgi qobuŋ na giloqnsibqa aqa aŋgro naŋgi segi segi maroqneb, “Iga bem osai. Iga bem oqajqa are walgwo. Agi bem qujai bole qujai qobuŋ miligiq endi unu.” 15Degsi mareqnabqa Yesus a naŋgo anjam di qusiqa yawo anjam bei endegsi minjrej, “Niŋgi geregere ŋam atsib soqniye. Bem tiyeqnu qaji sum Farisi naŋgo bem ti bulyimqa bem dena tiyekritosim tulaŋ kobaqujaqas. Herot aqa bem dego tiyekritosim tulaŋ kobaqujaqas. Deqa niŋgi geregere ŋam atsib soqniye.” 16Onaqa Yesus aqa aŋgro naŋgi aqa yawo anjam di qusibqa segi segi maroqneb, “Iga bem osai deqa kio mergwo?” 17Onaqa Yesus a naŋgo anjam di qalieosiqa nenemnjrej, “Niŋgi kiyaqa bem osai deqa mareqnub? Kiyaqa niŋgi e qa poiŋgosaiunu? Nuŋgo areqalo geteŋgejunu kio? 18Niŋgi ijo siŋgila unoqnsib unosaibuleqnub. Niŋgi ijo anjam quoqnsib quosaibuleqnub. 19E nami bem 5-pela giŋgeŋyosimqa tamo 5,000 anainjronam uynab menetnjrnaqa niŋgi iŋgi oto koroiyosib gumba kokba gembub jignab maqeleŋej?” Onaqa naŋgi na Yesus minjeb, “Gumba 12-pela.” 20Onaqa olo minjrej, “Bati bei e bem 7-pela dego giŋgeŋyosimqa tamo 4,000 anainjronam uynab menetnjrnaqa niŋgi iŋgi oto koroiyosib gumba kokba gembub jignab maqeleŋej?” Onaqa minjeb, “Gumba 7-pela.” Onaqa minjrej, “Niŋgi ijo kumbra di unoqnsib olo are walŋgwo kio? 21Niŋgi kiyaqa e qa poiŋgosaiunu?”

22Yesus a na naŋgi degsi minjrsiqa koba na qobuŋ na gilsib Betsaida qureq di tiryeb. Tiryosib mandamq ainabqa tamo qudei naŋgi na tamo bei ŋam qandimyej qaji a Yesus aqa areq osi bosib minjeb, “Ni ino baŋ aqa gateq di atimqa a olo boleosim ŋam poiyqas.” 23Onaqa Yesus na tamo di aqa baŋ ojsiqa qure polomq osi gilsiqa aqa ŋamdamuq di misel atetej. Osiqa aqa gateq di aqa baŋ atsiqa nenemyej, “Ni sawa unqa kere e?” 24Onaqa a ŋam atsiqa marej, “E tamo naŋgi unjronum naŋgi ŋamtaŋ bul anŋileqnub.” 25Onaqa Yesus na tamo di aqa ŋamdamuq di aqa baŋ olo atnaqa a ŋam atej ŋamdamu bole suwaŋej. A sawa kalil geregere unej. 26Onaqa Yesus na minjej, “Ni ino talq gilime. Ni qure miligiq gilaim.”

Yesus a tamo yai? Pita na ubtej

27Onaqa Yesus a na aqa aŋgro naŋgi olo joqsiqa koba na walwelosib Sisaria Filipai qure naŋgo sawaq di brantosib gamq dia Yesus na aqa aŋgro naŋgi endegsi nenemnjrej, “Tamo uŋgasari naŋgi e nuboqnsib naŋgi e yai qa mareqnub?” 28Onaqa naŋgi na minjeb, “Tamo qudei naŋgi mareqnub, ni Jon yansnjro qaji tamo. Tamo qudei naŋgi mareqnub, ni Elaija. Ariya qudei naŋgi mareqnub, ni Qotei aqa medabu o tamo naŋgi nami soqneb deqaji bei.” 29Onaqa Yesus na olo nenemnjrej, “Niŋgi segi e nuboqnsib niŋgi e qa kiersib mareqnub?” Onaqa Pita na minjej, “Ni segi qujai Kristus Qotei na qariŋmej qaji.” 30Pita a anjam degsi ubtonaqa Yesus na aqa aŋgro naŋgi siŋgila na getentnjrsiqa minjrej, “Niŋgi anjam di tamo qudei minjraib.”

Yesus a moio qa ti a olo subq na tigelo qa ti anjam marej

31Osiqa minjrej, “E Tamo Aŋgro. Deqa bunuqna e jaqatiŋ koba oqai. Juda tamo kokba ti atra tamo kokba ti dal anjam qalie tamo naŋgi ti e qoreibosib lubsib moiotbqab. Bati qalub koboamqa e olo subq na tigelqai.” 32Yesus a anjam degsi ubtsiq naŋgi minjrnaqa Pita a qusiqa Yesus osiqa qalaq gilsiqa ŋiriŋtosiq minjej, “Ni anjam degsi maraim.” 33Onaqa Yesus a bulosiqa aqa aŋgro naŋgi kokoqnjrej. Osiqa olo Pita koqyosiqa ŋiriŋtosiq minjej, “Ni Satan bul. Deqa ni ijo qoreq gile. Ni Qotei aqa areqalo dauryosai. Ni mandam tamo naŋgo areqalo dauryonum. Daurysim agi ni na anjam di merbonum.”

34Osiqa tamo uŋgasari kalil naŋgi ti aqa segi aŋgro naŋgi ti metnjrnaqa aqa areq bonabqa minjrej, “Tamo bei na e daurbqa osimqa a aqa segi areqalo kalil uratosim bati gaigai aqa segi ŋamburbas qoboiyosim e daurboqnem. 35Di kiyaqa? Tamo bei a aqa segi ŋambile qa areqalo kobaiyqas di a padalqas. Ariya tamo bei a e qa ti ijo anjam bole qa ti are qalsimqa aqa segi ŋambile uratqas di a olo ŋambile bole oqas. 36Tamo bei a mandam qa ñoro kalil koroiyqas di mondoŋ aqa segi qunuŋ padalqas. Yimqa ñoro dena a kiersim aqaryaiyqas? Di keresai. 37Aqa qunuŋ padalqas di a awai kie atsim dena aqa qunuŋ olo ŋambile sqas? Di keresai. 38Tamo uŋgasari bini bati endeqa unub qaji naŋgi Qotei torei qoreiyoqnsib une atsib laqnub. Deqa tamo bei a ijo ñam qa ti ijo anjam qa ti jemaiyqas di mondoŋ e Tamo Aŋgro e ijo Abu aqa riaŋ na ti ijo Abu aqa laŋ aŋgro naŋgo riaŋ na ti bosiyqa e kamba tamo di aqa ñam metqajqa jemaibqas.”